يا قلبي لا تتعب قلبك!

...
https://www.youtube.com/watch?v=gkZ69x4tRLg

ويلي!

https://www.youtube.com/watch?v=nQS6TguZeZg&spfreload=10
أنا بحب الأغنيه دي عشانك! :))
صباح الخير <3

ughhhh

انا مش عارفة المفروض اجي هنا كام مرة اقول ان نفسي اتنيل اتجوز بس انا نفسي اتنيل اتجوز بقه -_-

الدنيا سقعة

يارب يارب
نفسي اتجوز بقه ونقعد ف السقعة تحت البطانية ناكل عدس اللي بلال بيقول عليه شوربة عدس بس انا شايفة انه عدس بس يعني شوربة ليه، و مننزلش من البيت، يارب مننزلش من البيت بقه بقه ونتجوز ونقعد جمب بعضينا  :(

صباح الخير ^_^

فاكرة!؟ :))
https://www.youtube.com/watch?v=nkeLYw18xPk

كنت عبيط والله! ومازلت يعني :D
ربنا يخليكي ليا :))

حبيبي بعد حبّة هيهل بالمحبة ! ^_^

من ساعة ما صحيت وانا عمالة اغني حبيبي بعد حبّه هيهل بالمحبة قلبي يبوسه على خده ويجري يستخبّى ، الصغنطط جايلي بكرة والحقيقة ان مجيّك ده الحاجة الوحيدة اللي مصبراني على هذه الأيام الكئيبة، متتأخرش عليا يا صغنطط و البوسة اللي على خدك اهي وانا هجري استخبى ^_^ :* :* https://soundcloud.com/madsolutions2014/ahyahawa

اتخمدي يا اسمك ايه -_-

كتبت كلام كتير.. ومسحته

مافيش حجة أطلع بيها من هذا المأزق غير اني أقولك البيت المتين بتاع الحج نزار

"كلماتنا فىالحب تقتل حبنا..فإن الحروف تموت حين تقال"

أنا بحبك.

اتخمدي <3 

مهما طال وطوّل..انا قلبي عَنه ما يتحوّل!

ممممممم
يعني مثلا بقدر ما إنتِ عايزة الأجازة تيجي عشان تخلصي من القرف والامتحانات أنا مش عايزها تيجي..
أول ما هتيجي هسافر يا بسنت وانا مش عايز أسافر!
مش فاكر المرة اللي فاتت بسبب اني سافرت 12 يوم حسينا ايه؟؟
أنا بحبك ومش عايز أسافر ولا أروح حتة! -_-
وانا مش عايز حد يدخل يقرا انا بكتب لك ايه وبقولك ايه!
هما مال أمهم هُمّا..إنتوا مال أمكوا انتوا؟ هاه؟!
يارب تخلصي القرف والامتحانات بس يارب الاجازة ماتجيش
بحبك.
https://www.youtube.com/watch?v=OTR3Ca7se7E

آآ فولو أ فولو يو ديب سي بيبي أ فولو يو

الصغنطط تعبان يا صغنطط :(
و هيجيله برد ده ولا ايه ودايخ خالص وورايا شغل المفروض اسلمه بكرة ولسه معملتش اي حاجة و محمد لسه مروحش عشان يبعتلي الصور اللي المفروض هشتغل منها و جسمي مكسّر خالص و بوظت الدايت وجبت بيتزا وحاجة وحشة خالص مالص :(
ومن امبارح وانا حاسه اني هبقه سعيدة جدا لو خلفت عيل اهبل زيك كده وبتخيل شكله وهو عبيط وعمال يتشقلب و يلف حوالين نفسه ف نص الأوضة، يخربيت المسخرة :D :D مع اني مش بحب الولاد يعني وكنت احب اني اجيب بنت، بس لو الولد هيبقه عبيط شبهك ف ياريت جدا يعني، البنات بيرخموا اساسا :D
انا نفسي في كوباية هوت شوكليت، ومش بقول كده دلع -_- بس انا فعلا نفسي ف كوباية هوت شوكليت من سلينترو و قولت لنرمين تنزل معايا وقالتلي ماشي  بس هي بتعمل حاجات دلوقتي مش عارفة هننزل ولا ممكن تتشغل، المهم، انت عارف ؟ انا من كام يوم كنت بفكر في خطة جدية عشان اشوف هعدي الشهر ده ازاي لحد ما الاجازة تيجي، كل الخطط بتفشل والكلية بتطلّع عيننا - وخليها عيننا - ومفيش أي مجال لأي راحة على أي مستوى، أنا قعدت افكر لحد ما قولت اني هحط السماعات ف وداني ومش هشيلها أبدا، عملت فولدر جديد اسمه " هنهرب" و حطيت فيه كام اغنية لسه عملالهم داونلود، شحنت ال MP3 وبس كده، انا مش عايزة اسمع اي حاجة ولا اعمل اي حاجة لحد ما ربنا يتوب عليا و اخلص الترم المقرف ده ، انا بحبك اوي وعايزة اتجوز بقه -_-
انا تعبانة اوي ومش قادرة اكمل كتابة، مع السلامة يا صغنن، والأغنية اهي متزعلش https://soundcloud.com/coraliea/i-follow-river-lykke-li :* <3

قشر لي وانا ارتاح!

يا صباح التِفاح :3
بقالي كتير مابكتبش هنا..مع اني هنا ع طول! :))
طيب لحد ما الوحي ينزل يعني، فخلي بالك مني!
خلي بالك مني زي مانتِ مخليه بالك مني كدا :**

 https://www.youtube.com/watch?v=-ZC6iuvzJ_k

يا حبيبي كُل ما في الصمت نادى ..

انا معنديش حاجة معينة اقولها، بس لقيتني بشكل تلقائي بفتح هنا عشان أكتب. يا حبيبي إن أيامك عطر وإنتظاري لك خمرُ، أه والله يا بلال ! انا مش بحب اننا نروَح فاهم ؟ يعني ينفع نفضل مع بعض و منروحش ؟ المرواح ده بايخ اوي، انا نفسي متروحش يا بلال ، كل مرة بتبقه خلاص مروح ببقه عايزة امسك ف رجليك و اعيط و مخليكش تمشي، اصله ليه يعني ! الحياة رخمة اوي وانا مش عايزة حاجة غير اننا نتمشى سوا بليل ونتكلم كتير ومنروحش، عيزانا منروحش يا بلال.
يا حبيبي وتعال . تعال
ياحبيبي إن ايامك عطرُ
وانتظاري لكَ خمرُ
ليس بالسكر ولكن فيه سكرُ
ليس بالنهرِ ولكن فيه نهرُ
له في القلب هدير
في الهنيهاتِ هدير
فتعال..
يا حبيبي
كل مافي الصمتِ نادى
يا حبيبي
ومضى الموجُ وعادا
وانا في موجِ عينيكَ شراعٌ يتهادى
سقطَ الليل عليا وتمادى
كادَ أنا يجعلني الليل سوادا
يا حبيبي كل مافي الصمتِ نادى ..

حبيبي خليك, وبيحلى السمر نشرب القمر ونوره بيرويك.

امبارح ده انا مستنياه وبحضرله بقالي اسبوع، بس هو كان يوم سيء يعني ممشيش خالص زي ما كان ف دماغي الحاجة الوحيدة اللي هونت عليا انك كنت جمبي ، انا كنت مفكرة اني تخلصت من موضوع اني اول ما اخرج اقول انا عايزة اروح وازمزء بس طلع معاك انت بس، ولسه زي ما انا عادي، قاعدين من امبارح يحصلّنا حاجات مرهقة و نحس حاجات رخمة، معرفش الناس بقوا مقرفين ولا هما اساسا كده واحنا اللي كنا بنستحمل، ربنا يبعدهم عننا و يقربنا من بعض، نفسي ف يوم بس سوا نخرج و نروح المعمورة نلعب و نجري وناكل و نقعد ع البحر، بس كده، يوم واحد هيخليني استحمل الشهر الرخم ده بتاع الامتحانات، ممكن ؟
بص، أصل انا مش عايزة اقوم من ع السرير، ولا عايزة اشوف حد، الحاجات بقت مُنهكة - هو في حاجة اسمها كده أصلا ؟ - يلا نسافر و نلف ونخرج و بس، يلا نتجوز ومنشوفش حد .

https://soundcloud.com/aamer-ibraheem/inhsvkhrni4i

"قابلني والأشواق في عنيه سلِّم سلِّم وخد إيدي في إيديه" AKA "نتقابل ف طنطا أرض وسط"

الباء راكب عربية مروّح من فُسحة ترد الروح - حرفيًا - مع الباء التاني، طنط اللي قدام تقرر في آخر ربع ساعة انها تطلع الموبايل وتشغّل أم كلثوم بصوت عالي ، انا جه ف بالي علطول " قابلني والأشواق ف عنيه سلم " من غير حتى ما افكر اغنية ايه وبعد المزيكا فعلا قالت كده ! الحتة دي انا بحبها اوي، عشان دلع ام كلثوم فيها و عشان بتفكرني بيك، انت عارف انه بيبان الاشواق ف عنيك صح ؟ وعارف ان عنيك بتضحك برضه ضحكة حلوة خالص ؟ واني المفروض اغنيلك دايما عينيك حلوين هاديين صافيين مليانة حنين بيخطفني وعنيك طعمين رايقين دافيين هتخدني لفين لفين وتسرقني ؟ هو انت لسه هتسرقني ؟ ، طب خلينا نتجاوز الموضوع ده :D 
النهاردة وانا مسافرة ف القطر قعدت احمد ربنا كتير اننا بنحب بعض بالقدر الكافي اللي يخلينا نتبهدل ويطلع عنينا عشان بس نشوف بعض ونبقه مبسوطين و بنرفرف بجناحات كمان، وعلى نعمة الخفة وإننا متقلناش ، وانه حتى لو هنشوف بعد بكرة بس انت واحشني دلوقتي ليه ماخدش نفسي واجيلك عشان بس انول نظرة من عيونك هاه ؟
انا بقيت شاطرة ف الكلية وده شيء كويس يعني الحمد لله، بتعب وكل حاجة بس احسن من التعب اللي من غير فايدة، ربنا يراضينا و يرضى عننا.
بقع من النوم و حاسه ان في حاجات كتير ف اليوم تتحكى بس مش فاكرة ولا حاجة دلوقتي وغالبا اول ما احط راسي ع المخدة هفتكر كل حاجة، ف لحد ما ارجع واكتب تاني كل حاجة افتكرتها، أنا بحبك، بسنتوت بسنتيت بسنتات خطيبتك، تحريرا في 1/12/2014 يوم ما روحنا لبعض طنطا عشان واحشين بعض و كل واحد لو سافر للتاني الوقت هيضيع ف طنطا ارض وسط، <3

ويلي من الأحمقين!

https://www.youtube.com/watch?v=CF7lptXIh9U

نم نم نم
بقالي كتير عايزة اكتب بس الحاجات بتطير من دماغي، المهم اني النهاردة جيت من الكلية نمت و صحيت قعدت شوية وقومت عملت كوكيز ومن ساعتها قاعدة ع السرير وهنام تاني، كام ساعة من السكينة التامة، مبعملش اي حاجة ، قاعدة وخلاص.
 من شوية قعدت اسمع
تلج تلج عم بتشتي الدني تلج
 والنجمات حيرانين و زهور الطرقات بردانين
تلج تلج عم بتشتي الدنيي تلج
 و الغيمات تعبانين عالتلة خيمات مضويين
 و مغارة سهرانه فيها طفل صغير
بعيونو الحلياني حب كتير كتير
انا قولتلك ان مع إني مش من الناس اللي بتحتفل بأي حاجة بس انا بحب الكريسماس بشكل خاص، بحب الجو والشوارع وبحب احضر حاجات صغنتوتة فيه، والاغنية حسستني بيه اوي، او تقريبا انا حسيت بيه ف شغلت الاغنية، المهم يعني أنا هنام وانا ممتنة لانهاردة، وانت بخير :)

 https://www.youtube.com/watch?v=IKzk3hpCuW8

سهرني عليك.. سهرني معاك

بحبك ومش عارف أقول حاجة :((

بقالي 3 ساعات صاحي مش بعمل حاجة غير اني بحبك!

قولت ف الأول هشتغل بس كنتي وحشاني فقررت اني مش هعمل حاجة غير اني هحبك..

بس! :(

https://www.youtube.com/watch?v=Dfg90Bx6F8k

عزيزي الباء اللي لسه نايم لحد دلوقتي

صباح الخير، النهاردة يوم حلو أوي، هو فعليَا اليوم لسه مبدأش وانا ع السرير وانت لسه مدروخ ومصحيتش حتى بس هو كده الأيام الحلوة بتبان يابني أصلا ! دكتور الأنف والأذن اللي لسه كنت عنده اداني كام حاجة من بينهم " مايّة بحر" يعني ماية البحر اللي طول عمرها بتتعبني اما تدخل ف مناخيري و تخلي الحساسية تزيد فجأة بقت هي علاجي ! إشي خيال يا ناس، ولا يمكن عشان دي ماية بحر بخمسة وخمسين جني ف هي كده بنت ناس بتخفف، التانية دي بتِتعِب ؟ يلا ! المهم إن النهاردة الجمعة وإن أنا من إمبارح كل شوية افتكر ان النهاردة الجمعة ف اتبسط واقول حبيبي جاي بكرة و انسى وافتكر واتبسط وانسى، س سؤال: هل تعلم إن سعاد حسني لما قالت " حبيبي بعد حبّة هيهل بالمحبة" كان احساسي هو اللي رجعلها دشليون سنة قالها الجملة دي وبعدين رجعلي تاني ف 2014 ؟
ولما بعدها قالت، قلبي يبوسه على خده ويجري يستخبى، كنت انا برضه اللي قيلاهالها أصلا ! -_- ، طب بزمتك في قلب حد غيري بيبوسك على خدك وبيجري يستخبى ؟
بكرة تسليم المشروع وانا لسه قدامي شوية حلوين بس مش متوترة ولا حاجة، انا تنين اصلا يعني :3 انا بقالي سنتين بقول اني مش بعرف ألون بس اكتشفت اني بعرف، مش يمكن لو كنت جربت كنت لقيتني بعرف ووفرنا على نفسنا قلبة الدماغ اللي بقالها سنتين و ولولة نزول مشروع ألوان علينا ؟
كنت جبت من اسبوعين شاور جيل وكريم لإيدي بالتوت و النعناع ويتش إز أمازينج يعني ! تشم توت ولحظة بس وتلاقي لذعة النعناع، وجبت شراب نبيتي و كريم بالكريز لرجليا، أنا مش من الناس اللي بتعرف تلتزم أو اللي مهتمه لدرجة انها تحط كل يوم بس إحساس حلو انهم موجودين وان وقت ما أحب أدلّع نفسي هلاقيهم جمبي ع السرير بيقولولي نحن هُنا.
أنا نفسي اشتري بيانو بقه وابدأ اتعلم، انا مقولتلكش عن رحلة اني الاقي آلة موسيقية تشبهني ؟ بص هي مش رحلة أوي ولا حاجة اللي حصل إني كان نفسي ألعب مزيكا وكنت ف دار الموسيقى العربية بالصدفة مرة ف قولت هجيب هارمونيكا، معرفش عشان تشبهني ولا عشان رخيصة ؟ المهم اني حبيتها اوي بس ماكنتش عارفة اعمل عليها حاجة، روحت اتعلم ف الكونسرفاتوار والاوبرا و كذا حاجة بس ولا حد فيهم عنده تعليم هارمونيكا، والحاجات ع اليوتيوب مختلفة عن الهارمونيكا بتاعتي، المهم اتشالت ف درج اللي بيشيل كل حاجة ده وبعدها فجأة حبيت البيانو، " لسبب غير معروف " حتى لما كنا ف حفلة رمزي يسي كانت أكتر حاجة بتلمسني هي البيانو وكان نفسي اروح اخبطه بحاجة واقعد مكانه :D
امبارح وانا ف الكلية بكتبلك جواب لقيت كذا حفلة ف المكتبة بيانو و باليه حلوين أوي، هتوديهوملي ؟
حفلات المكتبة بتفصلنا شوية، أو ف الحقيقة كتير عن حقيقة الناس والمواصلات والحاجات، بنبقه اتنين عايشين ف باريس وهو حوّد عليها بالعربية خدها يحضروا حفلة و طلعوا والدنيا بتشتي ركبو العربية وصلها لحد البيت وروّح، هو أنا مقولتلكش ؟ مش الدنيا عمّالة بتشتي من الصبح جامد جدا جدا ؟ مش قولتلك النهاردة يوم حلو ؟
 https://www.youtube.com/channel/UCR_QmUbDEz_vHO0AehbgocQ

في شي مكان ..

انا نفسي نعمل Pause لكل حاجة ونفضل ف حضن بعض وخلاص بقه، مش عايزة احداث ولا حركة ولا اي حاجة.

مش
عايزة ندخل اي اماكن فيها ناس كتير تاني، عايزة نتمشّى احنا لوحدنا كده
وبس، بص انا تعبانة وعايزة انام، انت عارف عموما يعني، وإنت بخير .

الباء مزمزق

الباء المزمزق من ساعة مارجع والباق التاني بيطبطب عليه وهو عمّال يرخم ويشيل ايده..
انا حاسس اني مرهق جدا وعايز الباء ياخد أجازة من الشغل ومن الكلية بتاعة الباء التاني ويرحوا أي حتة مافيهاش دوشة
https://www.youtube.com/watch?v=zdcSP_8_xoo

الباء اللي بيسعى

الباء اللي بيسعى انه يسعى كان برّة بسعى انه يسعى رجع لقا الباء البيتوتي عامل المدونة فتح قرا..اتبسط وفرح جدا الباء النائم نايم دلوقتي وهو واحشني مش هعرف اقول كلام كتير زي ماهو بيقول لانه أصلا باء كاتب تصبح على خير يا بائي :) .

الباء المُمتلى والباء اللي بياكل كتير

بلال بلال تعالى نعمل مدوّنة.
ماش
هنسميها ايه ؟
معرفش
ايه ايه ايه ايه ؟
فكّر فكّر
الباء المحب ؟ الباء الأهبل ؟ ممم عايزين حاجة زي الصابون يقتل كده :D
الباء البيتوتي ؟
اه اه ^_^
وقد كان، ماي سوبر هيرو اللي بيعرف بقدرته الخارفة -ويتش إز مش هزار ولا مُحن أبدًا يعني- بيعرف يحل كل حاجة ف ثواني، زي الساحرين لما بيعملوا بعصايتهم سحر ف العصاية تطلّع شراراة نار ثواني وتروح، اي مشكلة بتطلع زي الشرارة في ايد بلال وثانية وتروح.
انا ف العموم بحب الخروج اكتر من البيت بس انا بحب البيت عشان بلال وبس، عشان بنتكلم و نحكّي ونبقه سوا، وكمان سنة هنبقه نايمين جمب بعض ومتغطين وقاعدين نضحك على فيلم ولا على كلامنا، البيت وبلال برّه بيبقه رخم وكئيب وببقه قاعدة لوحدي.
المهم يعني الباء اللي بياكل كتير راح امبارح فتح الله واتبسط خالص مالص والله ! وجاب حاجات كتير حلوة ! من صوص إيطالي للمكرونة ل صوص فرنساوي للسلطة ل فاصوليا حمرا و تونة بالدرة و حاجات تانية كتير، انا بحب اجيب اكل وحاجات واقف ف المطبخ ومش عايزة غير قبل الجواز اخد بتاع عشرتاشر الف جنيه واروح فتح الله اجيب كل الحاجات اللي نفسي فيها واما اخلّص اطلع على مترو اجيب كل الحاجات اللي نفسي فيها واما اخلص اطلع على كافور، بس ابقه هاتلي تلاجتين تلاتة بقه عشان يقضوا الحاجات :D
الباء اللي بياكل كتير قام من شوية عمل فادج الشوكلاتة اللي هيبعته لحماته واخوات خطيبه يوم الجمعة ان شاء الله، و الطفاسة خدته و قام من شوية يدوق وطلع حلو جدا جدا، يارب بس يوصلهم سليم هاااا هاااا :D
الكلية مطلّعة عين اللي خلفوني ونفسي ارتاح شوية، و قاعدة بفكر اقوم اعمل لنفسي كريب شوكلاتة ولا اقوم انام لحد ما تيجي بس تقريبا هنام واما تصحيني هبقه اعمل الكريب، وانت بخير يا صغنطط :*